අද දිනයේදී පෘථිවිය ආසන්නයෙන් ගමන් කරන අති විශාල ග්‍රහකය...😟

මේ මස 19 වනදා උදෑසන, එනම්  අද දින පෘථිවිය ආසන්නයෙන් විශාල ග්‍රහකයක් ගමන් කිරීමට නියමිතයි. මෙහි දළ විශ්කම්භය කිලෝමීටර 1.1 ක් පමණ වෙනවා. විශාලත්වය සන්සන්දනය කිරීමේදී මෙය ලොව ඇති උසම ගොඩනැඟිල්ල වන 

Burj Khalifa ගොඩනැඟිල්ලටත් වඩා මදක් විශාල වන අතර කොළඹ පිහිටි නෙළුම් කුළුනත් සමඟ සැසදීමේදී තුන් ගුණයක පමණ විශ්කම්භයකින් යුක්ත වෙනවා.

1994 PC1 (7482) ලෙස හඳුන්වන මේ ග්‍රහකය සූර්යයා වටා කක්ෂ ගතව ඇති ඇපලෝ කාණ්ඩයේ ග්‍රහකයකි. 1994 වසරේ දී ඕස්ට්‍රේලියානු ජාතික තාරකා විද්‍යාඥයෙකු වූ රොබට් මැක්නෝට් විසින් සොයාගන්නා ලද මෙම ග්‍රහකය සෑම අවුරුද්දයි මාස 7 කට (දින 572) වරක් සූර්යයා වටා එක් වටයක් සම්පුර්ණ කරනවා. ඉහත දෙවන රූපයේ දක්වා තිබෙන්නෙ මෙහි කක්ෂය යි. ඒ අනුව ඔබට පෙනෙනවා ඇති එය පෘථිවි කක්ෂය හරහා ගමන් කරන බව.

මේ ග්‍රහකයෙන් පෘථිවියට යම් තර්ජනයක් ඇතිවිය හැකිද?

විද්‍යාඥයින්ගේ ගණනය කිරීම් වල අනුව මෙම ග්‍රහකය පෘථිවියට ආසන්නයෙන්ම ගමන් කරන දින එනම් හෙට දින වන විට ග්‍රහකය පිහිටන්නේ පෘථිවියේ සිට කිලෝමීටර මිලියන 1.98 ක් පමණ දුරකින්. මේ දුර ප්‍රමාණය පෘථිවියේ සිට සඳට ඇති දුර මෙන් 5 ගුණකයටත් වඩා මදක් වැඩියි. එනිසා මේ ග්‍රහකයෙන් පෘථිවියේ සිටින අපට කිසිඳු ආකාරයක බලපෑමක් සිද්ද වෙන්නෙ නැහැ.

මේ ග්‍රහකය මීට වසර 89 කට පෙර, එනම් 1933 ජනවාරි 17 වනදා මෙවරටත් වඩා පෘථිවියට සමීපව ගමන් කර තිබෙනවා. එම අවස්ථාවේදී පෘථිවිය සහ ග්‍රහකය අතර දුර පරතරය වී තිබෙන්නෙ කිලෝමීටර මිලියන 1.1 ක් පමණයි. එසේම නැවතත් මේ ග්‍රහකය 2105 ජනවාරි 18 වනදා පෘථිවියට වඩා ආසන්නයෙන් ගමන් කිරීමට නියමිතයි. ඒ අවස්ථාවේදී මෙය පෘථිවියේ සිට පවතින්නේ කිලෝමීටර මිලියන 2.3 ක් පමණ දුරකින්.

මෙය පියවී ඇසින් නිරීක්ෂණය කල හැකිද?

මේ ග්‍රහකය පෘථිවියට ආසන්නම අවස්ථාවේදී එහි දෘෂ්‍ය දීප්ති විශාලනය වන්නේ +10ක් පමණ. මේ නිසා එය පියවි ඇසට හෝ දෙනෙතියකින් නිරීක්ෂණය කිරීමට අවස්ථාවක් උදා වන්නේ නැහැ.

නමුත් මෙය ප්‍රාථමික දර්පණයේ විශ්කම්භය අඟල් 6 හෝ ඊට වැඩි දුරේක්ෂයක් තුළින් නිරීක්ෂණය කිරීමේ හැකියාව පවතිනවා. එවැනි දුරේක්ෂයකින් ඔබ මෙය නිරීක්ෂණය කිරීමට බලාපොරොත්තු වන්නේනම් හෙට දින රාත්‍රී 7.30ත් රාත්‍රී 10ත් කාලය ඒ සඳහා තෝරාගන්න. මෙම කාලය තුළ ග්‍රහකය ගමන් කරන්නෙ මිථුන රාශි පසුබිමේයි. ඔබට Stellarium මෘදුකාංගය භාවිතයෙන් ඉහත කාලය තුල එය මිථුන රාශි පසුබිමේ ගමන් ගන්නා පථය සහ ඒ ඒ වේලාවන්හි පිහිටන ස්ථානය පහසුවෙන් සොයාගත හැකියි. 

එසේම එය එදින රාත්‍රී 7.55 සිට 7.57 අතර කාලය තුළ මිථුන රාශියේ Mu Piscium නැමැති තාරකාවට ඉතාමත් ආසනයෙන් ගමන් කරනවා. 

Mu Piscium යනු මිථුන රාශියේ ඉතා අඩු දීප්තියක් සහිත, නමුත් පියවී ඇසට දැකගත හැකි තාරකාවක්. මේ නිසා ඔබ දුරේක්ෂය ඉහත කාලය තුළ මේ තරුව වෙතට යොමු කර නොකඩවා නිරීක්ෂණය කිරීම තුළින් ඒ ආශ්‍රිතව ග්‍රහකය ගමන් කරන ආකාරය දැකගත හැකි වේ.